Bagong Pag-ibig, Bagong Simula: Mga Celebrities Na Muling Umibig

Marami sa mga sikat na personalidad sa showbiz industry ang nakaranas ng pait at sakit ng kanilang mga nakaraang relasyon. Ngunit sa kabila ng mga pagsubok na ito, may ilan sa kanila ang hindi sumuko at nanatiling bukas sa pagkakataon na magmahal muli. 

Sa mga pagkakataong ito, makikita natin ang kanilang determinasyon at pag-asa sa pag-ibig sa pamamagitan ng kanilang mga bagong pag-ibig na nagbigay ng kulay at saya sa kanilang mga buhay. Kilalanin ang mga celebrites na muling umibig.

1. Dina Bonnevie

Kahit hindi sila nagkatuluyan, nakahanap naman muli ng mga taong magpapatibok ng kanilang mga puso sina Bossing Vic Sotto at ang kanyang dating asawa na si Dina Bonnevie. Kinasal sina Vic at Dina noong 1982 at nagkaroon sila ng dalawang anak na sina Oyo Boy at Danica. 

Naghiwalay naman sila noong 1986 at nagpawalang-bisa ang kanilang kasal noong 1992. Ngayon, kasal na si Vic kay Pauleen Luna-Sotto habang si Dina naman ay kasal na kay Ilocos Sur Rep. Deogracias Victor 'DV' Savellano mula noong 2012.

Nagkakilala ulit sina DV at Dina noong nagte-taping si Dina para sa isang pelikula sa opisina ni DV. Dahil nagkatrabaho din sila sa isang business project, mas lalo pang lumalim ang kanilang pagkakaibigan hanggang sa nauwi ito sa pagmamahalan. Sa una, tinanggihan pa ni Dina ang panliligaw ni DV dahil ayaw niya sa pulitiko, pero dahil sa tiyaga ni DV, napa-OO siya at nagpursige ito hanggang mapasagot siya ni Dina. Si Dina ay 61 taong gulang na ngayon samantalang 62 naman si DV.

2. Snooky Serna

Maraming natutuwa ngayon dahil nakikita nilang masigla at masaya si Snooky Serna sa kanyang love life. Kahit nabigo siya sa kanyang dalawang kasal, unti-unti siyang nakabangon at nakahanap muli ng taong magpapakilig sa kanyang puso.

Akala niya dati na habambuhay na siyang magiging single kasama ang kanyang dalawang anak na babae. Unang ikinasal ang aktres sa aktor na si Ricardo Cepeda noong 1992 at nagkaroon sila ng dalawang anak na sina Samantha at Sachi.

Sa isang panayam ni John Lapuz sa Showbiz Central, inamin ni Snooky na naghiwalay sila ni Ricardo dahil may mga hindi nairesolbang problema tungkol sa pera. Hindi na nagbigay ng karagdagang impormasyon si Snooky dahil napakapersonal na raw nito.

Kahit 56 na si Snooky, hindi pa rin huli ang lahat para umibig. Sa kasalukuyan, nasa isang relasyon siya kasama ang dating Vice Governor ng Bulacan na si Ramon Villarana.

Kilala na nila ang isa't isa sa loob ng halos tatlong dekada, pero ngayon lamang talaga sila nagka-ibigan. Limang taon ding naging single si Snooky bago siya muli umibig.

Katulad ni Snooky, hiwalay din si Ramon sa kanyang asawa at mayroon din siyang dalawang anak sa kanyang dating kasintahan. Masaya rin ang mga anak nila sa relasyon nila dahil nakikita nila ang kilig at kaligayahan ng kanilang mga magulang kapag magkasama sila.

3. Ricardo Cepeda

In-love naman sina Ricardo Cepeda at si Marina Benipayo, isang dating modelo at beauty queen na naging aktres na ngayon, sa loob ng mahigit isang dekada ngayong taon. Mayroon ding dalawang anak na lalaki si Marina sa kanyang dating kinakasama pero hindi ito naging problema kay Ricardo dahil meron din silang dalawang anak ng aktres na si Snooky Serna. 

Noong kalagitnaan ng 80s, nagkakilala at nagsama sila bilang mga modelo. Sumali si Marina sa Bb. Pilipinas pageant noong 1992 at nanalo ng korona bilang Bb. Pilipinas Maja International.

Matapos ang mahigit tatlong dekada na walang komunikasyon, nagkitang mula sina Ricardo at Marina noong nagkatrabaho sila sa isang drama TV series na "My Binondo Girl" na pinagbidahan nina Kim Chiu at Xian Lim. Dito nagsimula ang kanilang pagmamahalan at nagdesisyon silang magsama at ipakilala ang kanilang mga anak sa isa't isa.

Naging malapit ang mga anak nila at turingan na ngayon bilang magkakapatid. Hindi pa sila kasal sa kabila ng mahigit sampung taong pagsasama dahil hindi pa naa-annul ang kasal ni Marina sa kanyang dating asawa. Hindi ito naging problema kay Ricardo basta't masaya sila at nagmamahalan.

4. Tootsie Guevarra

Isa sa mga nagpasikat ng mga sikat na kanta sa mga videoke tulad ng Kaba, Pasulyap Sulyap, Mahal Ka Sa Akin, Nang Dahil sa Pag-Ibig, Mr. Kupido, at iba pa ay si Emma Theresa Pinga, na mas kilala bilang Tootsie Guevarra. Isa siya sa mga kilalang mang-aawit noong dekada 90 at naging pambansang awitin ng mga taong in-love noon at magpasahanggang ngayon.

Noong 2004, iniwan ni Tootsie ang kanyang karera sa Pilipinas at nagpasya na manirahan sa Amerika kasama ang kanyang pamilya. Una siyang ikinasal kay Jansen Cunanan, isang Filipino-American, noong 2005 at nagkaroon sila ng isang anak na lalaki, ngunit hindi nagtagal ang kanilang relasyon. Nang makilala niya si Mike Monaco, isang Italian-American, muli siyang nagmahal at ikinasal sila noong 2012. Nagkaroon din sila ng isang anak na lalaki.

Namimiss din ni Tootsie ang buhay at pag-awit sa Pilipinas, at handa siyang tumanggap ng pagkakataong magbalik sa kanyang dating karera kung mabibigyan siya ng pagkakataon.

5. Michael de Mesa

Si Michael Edward Gil Eigenmann o mas kilala bilang Michael de Mesa ay isa sa mga magaling na kontrabida sa mga pelikula at telebisyon. Kahit nakakainis ang kanyang mga karakter sa mga palabas, ibang-iba naman daw siya sa tunay na buhay. Si Michael ay ex-husband ng aktres at direktor na si Gina Alajar.

Nagkamabutihan ang dalawa ng magsama sila sa pelikulang "Cofradia" noong 1973. Si Gina ay 17 taong gulang pa lamang nang manganak sa kanilang unang anak na si Ryan Eigenmann. May dalawa pa silang anak na sina Geoff at AJ.

Nang mag-1 taong gulang si Ryan, ikinasal sila ni Michael sa Sanctuario De Jose sa Greenhills. Simple lang daw ang kanilang kasal at kasama lamang ang pamilya at malalapit na kaibigan.

Nagsama sila ni Gina bilang mag-asawa ng 23 taon hanggang sa magdesisyon silang maghiwalay noong 2001. Ang kanilang kasal ay na-annul noong 2006. 

Samantala, si Julie Reyes-Eigenmann ang nagpapakilig ngayon sa puso ni Michael de Mesa. Siya ay isang mananayaw at choreographer at ikinasal sila sa Amerika noong 2011. Kahit mayroong 13 taong agwat sa kanilang edad, hindi ito naging hadlang sa kanilang pag-iibigan. Sa kasalukuyan, si Michael ay 62 taong gulang na samantalang si Julie naman ay 49 na ngayong taon. Nagdiwang sila ng kanilang 10th anniversary noong 2021.

6. Dennis Padilla

Blooming ang lovelife ngayon ng aktor na si Dennis Padilla dahil in-a-relationship siya sa Filipino-Australian na si Linda Gorton. Natagpuan nila ang pag-ibig sa isa't isa sa pamamagitan ng isang common friend noong bumisita si Linda sa Pilipinas noong 2008. 

Sa loob ng mahigit na isang dekada ay nanatiling matatag ang kanilang relasyon kahit na may malaking agwat sa kanilang edad, kung saan si Dennis ay 61 na taong gulang at si Linda naman ay 38. 

Nang maging magkasintahan sila, pinili ni Linda na manirahan kasama si Dennis sa Pilipinas. Nagkaroon sila ng dalawang anak na sina Gavin at Maddie, at mayroon ding anak si Linda mula sa kanyang dating partner na si AC.

Si Dennis ay may pitong anak sa tatlong iba't ibang babae, ngunit hindi niya ito ikinakahiya at ipinagmamalaki niya ang mga ito. Si Dennis ay dating kasal kay Marjorie Barretto at naghiwalay noong 2007. Biniyayaan sila ng tatlong anak na sina Julia, Leon at Claudia. Nagdesisyon ang kanilang tatlong anak na palitan ang kanilang apelyido mula Padilla sa Barretto.